شوفي الزمن يا يمة .. طمبور

[خالد مصطفى]

محمد جبارة
أضغط للاستماع (http://aafat.org/upload/uploading/youma.wma)
شوفى الزمن يايمه ساقنى بعيد خلاص
دردرنى
واتغربت
واتبهدلت
ورينى الخلاص
ساقنى القدر منك بعيد
جرعني كأس
يايمه
يا فيض الحنان الما كمل
يايمه
يا بدرى البشع دايماً يهل
يايمه
يا نور الصباح وكتين يطل
واشرى يا (زينوبه) ولدك
فى دروب الشوق كتل
محروم من الحب والمحنه
وراك همل
يا يمه يا بحرالمودة وكتين يفيض
يا يمه يا شعلة أمل زادت وميض
يا يمه يا عنقود كلام منظوم قريض
يا يمه يا نغماً حس بالشوق يرن
وافكارى فيهو .. بيرتعن
دمعاتى شانو .. بينزلن
واتذكرك يايمه
فى الدغش النسايمو يهبهبن
قايمى الصباح متكفلتى
شايلى الحليلى على المراح
والساعة ديك دابو ديكنا بدا الصياح
والطير صغارو يغردن .جبتى اللبن بانشراح
واتذكرك يايمه
ساعة الهجير
صالاكى نارالدوكى عُستيلنا الفطير
رشيتى قلتى اكلوهو خير
واتذكرك يايمه يابسمة الطفل الغرير
وكت الخلوق ترقد تنوم
واسهر براى أرعى النجوم
والشوق يرف جنحيهو
بى فوق لى يحوم
اهتف باسمك فى الخيال
طيفك كمان بي فوقى جال
واتمنى لو لحظات يدوم
لكنى فجأة القاهو زال
واتذكرك يايمه
ساعة الناس يجونا من البلد
ناعم ترابا على جسيماتن رقد
ريحة التمر فوق الهدوم
لون الخدار خانس لّبد
والشوق أوارو بيشتعل
كان ظنى فيهو يكون خمد
واتذكرك يا يمه
والناس قالو قايمين البلد
رصو الهديمات ..عدلوا
ركبوا اللوارى وقبلوا
خلونى وحدى بلا أنيس
كيف انفرادى ..اتحملوا
شالوا السلام من عندى ليك
وان شاء الله عندك يوصلوا
يا يمه ساعة يوصلوا
ويقولوا ليك ..شفناه فى بلد الامان
مبسوط ورايق فى امان
أنبسطى يا نبع الحنان
وانا حالى يشهدبو الزمان
يا يمه رسلى لى عفوك
ينجينى من جور الزمان
يايمه
رسلى لى عفوك
ينجينى من جور الزمان

[ضاوي حسن السني]

خالد ياخى مالَك علينا !

[حاتم هاشم]

بسم الله الرحمن الرحيم
سلام ...
خالد ... حياك الله .
كما قال اخونا ضاوي ..
خالد ياخى مالَك علينا !داير تجهجهنا مالك يامان .. اصلو انحنا برانا متجهجهين ...
( اخوكم بي هني مو شااايقي ) ..
وبعدين انت قلت اغاني الطمبور دي ما عندك معاها موضوع الجدا شنؤ . ;) ;) ;)
تسلم يا غالي علي النص والصوت ..

تحياتي ... و احترامي .

[خالد مصطفى]

والله يا حاتم (إنقليزيكم دا) ما عندي معاه فعلاً أي جاز .. لكن الأغنية دي بالذات الواحد من تب وقام قايمة معاه .. والموضوع البتتكلم عنه ما ساهل .. ومعليش إن كنا (جهجهناكم) إنت والخال ضاوي .. لكن الواحد بحاول يخلي الجو هنا وهنا زي بعض ..

[ضاوي حسن السني]

مشكور يا خالد .